У Цэнтральным батанічным садзе Нацыянальнай акадэміі навук ганаравалі медыцынскіх сясцёр медыка-сацыяльнай службы «Дапамога» і ўладальніц медаля імя Флорэнс Найтынгейл. Вельмі прыгожае свята сярод квітнеючых прысад арганізаваў Беларускі Чырвоны Крыж з нагоды Міжнароднага дня медыцынскай сястры.
Медыка-сацыяльная служба Чырвонага Крыжа «Дапамога» пад рознымі назвамі дзейнічае ў Беларусі амаль 60 гадоў. Сёння яна аб’ядноўвае больш як 170 медыцынскіх сясцёр і малодшых сясцёр міласэрнасці па ўсёй краіне.
Гэтыя самаадданыя жанчыны аказваюць дапамогу на даму людзям, якія маюць у гэтым найбольшую патрэбу: пажылым адзінокім грамадзянам, інвалідам, якія цалкам або часткова страцілі здольнасць да самаабслугоўвання і перамяшчэння. Дзякуючы медыцынскім сёстрам Чырвонага Крыжа сотні людзей не засталіся сам-насам з цяжкімі хваробамі і адзінотай, а адчуваюць такія патрэбныя ім падтрымку і клопат.
Павіншаваць медыцынскіх сясцёр з прафесійным святам прыехалі кіраўнік місіі Міжнароднага камітэта Чырвонага Крыжа ў Беларусі Себасцьян Фусцье, прадстаўнік Сусветнай арганізацыі аховы здароўя ў Беларусі Сяргей Дзіёрдзіца, прадстаўнікі Міжнароднай арганізацыі «Урачы без межаў», супрацоўнікі Міністэрства аховы здароўя, Міністэрства працы і сацыяльнай абароны.
З вітальным словам да каляжанак звярнуліся ўладальніцы вельмі рэдкага і пачэснага медаля імя Флорэнс Найтынгейл. Гэтая прэстыжная ўзнагарода была зацверджана ў 1912 годзе Міжнародным камітэтам Чырвонага Крыжа і Чырвонага Паўмесяца і прысуджаецца раз на два гады. Pro vera misericordia et cara humanitate perennis decor universalis — за сапраўдную міласэрнасць і клопат пра людзей, што выклікаюць захапленне ўсяго чалавецтва, — надпісана на зваротным баку медаля на абадку. А ў цэнтры — гравіраванае імя ўладальніцы і дата ўзнагароджання. На пярэднім баку медаля — выява жанчыны са свяцільняй як сімвал дабра, міру, міласэрнасці і надзеі.
Зараз у Цэнтральным батанічным садзе, недалёка ад аранжарэі, распрацоўваецца новы ўчастак — так званы Усходні сад. Хутка гэта будзе вельмі прыгожая тэрыторыя, і тут у гонар усіх беларускіх уладальніц медаля імя Флорэнс Найтынгейл удзельнікі свята высадзілі 15 кустоў гартэнзіі. Расліны ўнікальныя тым, што могуць спалучацца з любымі кветкамі. Гэтая асаблівасць ёсць і ў рабоце медыцынскай сястры, якая знаходзіць падыход да кожнага, нават самага складанага пацыента.
Тут жа як сімвал медыка-сацыяльнай службы Чырвонага Крыжа «Дапамога» пасадзілі ягадную яблыню.
Таццяна Гаплічнік, странавы каардынатар Швейцарскага Чырвонага Крыжа ў Беларусі:
Як правіла, людзі сустракаюцца з медсёстрамі, калі ім дрэнна, калі баліць. Але пасля выздараўлення цяжкі жыццёвы перыяд ужо не хочацца ўспамінаць. А медсёстры бачаць боль і пакуты кожны дзень. Асаблівасць іх розуму і душы ў тым, што яны ўмеюць перапрацоўваць боль і пакуты ў дабрыню, чуласць, радасць, святло.
Гэта як расліны, якія перапрацоўваюць вуглякіслы газ у кісларод і радуюць нас у любое надвор’е. Саджанцы, якія мы сёння пасадзілі, хутка вырастуць: распусцяцца раскошныя кветкі, на яблыні з’явяцца плады. Людзям, якія стануць прыходзіць ва Усходні сад, яны будуць нагадваць пра тое, якая прыгожая і важная прафесія медыцынскай сястры.
Намесніца генеральнага сакратара Беларускага Чырвонага Крыжа Раманія Зорына ўшаноўвае медыцынскую сястру міласэрнасці, лаўрэата медаля імя Флорэнс Найтынгейл 2009 года, гераіню дакументальнага фільма «Зіма пройдзе» Ніну Блізнюк.
Сёння ў свеце каля 20 мільёнаў прафесійных медыцынскіх сясцёр, але толькі каля 1,5 тысячы з іх валодаюць медалём імя Флорэнс Найтынгейл. Да апошняга часу ў Беларусі такой узнагароды былі ўдастоены 14 медыцынскіх сясцёр (6 з іх — за подзвігі ў ваенны час). І літаральна днямі стала вядома, што прэстыжны медаль прысвоены таксама Алене Філіповіч (на здымку), медыцынскай сястры медыка-сацыяльнай службы «Дапамога» з Вялікай Бераставіцы. Ён пакуль яшчэ не дастаўлены ў нашу краіну, яго ўручаць крыху пазней, але ўжо сама навіна прынесла вялікую радасць і гонар за беларуску.
