Першакурснікам уручылі сімвалічны ключ ад ведаў і залікоўку — намёк на добрую вучобу. А самае галоўнае, у гэты дзень яны ўпершыню апранулі белыя халаты і адчулі сябе часткай вялікай медыцынскай сям’і.
Дзмітрый Піневіч, міністр аховы здароўя:
Вы ўліваецеся ў калектыў, які мае векавыя гістарычныя традыцыі, слаўную сучаснасць і вялікія перспектывы. Няма больш складанай прафесіі, чым тая, якую вы выбралі. Аднак гэта прафесія дае магчымасць у поўнай меры служыць людзям. На вашым шляху будуць і перамогі, і паразы. Але любая параза павінна набліжаць вас да прафесіяналізму. Удасканальвайцеся дзеля адной мэты — дзеля здароўя пацыентаў!
Сёлета першакурснікамі БДМУ сталі 1 035 беларускіх выпускнікоў. Сярод іх 367 медалістаў. На медыцынскі факультэт замежных навучэнцаў залічана 178 чалавек (і набор яшчэ доўжыцца).
Адметна, што першакурснікі пачынаюць вучобу ў БДМУ ў год яго стогадовага юбілею.
Рэктар БДМУ прафесар Сяргей Рубніковіч заўважыў, што маладыя людзі прайшлі няпросты шлях, каб стаць студэнтамі.
Сяргей Рубніковіч:
А праз некалькі гадоў спраўдзіцца яшчэ адна ваша мара — вы набудзеце найлепшую, самую запатрабаваную, самую высакародную прафесію на Зямлі, місія якой — зберагаць здароўе і жыццё людзей. Гэта няпроста. Але паверце нашаму вопыту: нішто не параўнаецца з тымі пачуццямі, якія вы будзеце атрымліваць, калі ўбачыце плён сваёй працы — выратаваных вамі людзей.
Старшыня Беларускага прафесійнага саюза работнікаў аховы здароўя Вячаслаў Шыла таксама павіншаваў першакурснікаў, якія папоўнілі вялікую медыцынскую сям’ю, і перадаў грашовы сертыфікат на 10 тысяч рублёў.
Фота Таццяны Сталяровай, «МВ».